Unha vintena de veciños de Frades participa nunha charla sobre o CIM

Unha vintena de veciños e veciñas de Frades asistiron o venres 25 de novembro a unha charla informativa organizada polo Concello de Frades, en colaboración co Centro de Información á Muller (CIM) da Mancomunidade de Ordes. Unha sesión na que Nazaret González, directora do CIM da Mancomunidade de Ordes, e Dolores García, psicóloga do CIM, lles explicaron os servizos que ofrece o CIM: información xurídica, atención psicolóxica e información sobre os recursos existentes na zona en materia de conciliación familiar, axudas para vítimas de xénero, formación, actividades de tempo libre, etc.

Así mesmo, proxectaron un vídeo de 7 minutos que é un resumo dun traballo realizado polos alumnos do IES Castelao (Ordes) contra a violencia de xénero, titulado "Orballo". Despois da proxección do vídeo, os veciños e veciñas de Frades amosaron a súa sorpresa polo seu contido, xa que eran mulleres vítimas de violencia de xénero quen contaban o seu caso e como conseguiron superar esta situación. "Elas fixérono para demostar a outras mulleres que con apoio se pode saír desta situación, ter unha vida nova e nun entorno seguro de parella", explicou Nazaret González.

Unha vez rematada esta charla, tomaron a palabra dous membros da Garda Civil de Santiago, quen destacaron o traballo realizado dende o CIM e lembraron que, no caso de violencia de xénero, cando hai unha denuncia o primeiro que se fai é asegurar a seguridade da persoa que pide axuda, polo que lles aseguraron aos presentes que sempre contarán co apoio das forzas e dos corpos de seguridade.